Wie 'ne baby
Kumt 'ne man in 'ne poef en direk klampt 'm al e medsje a:
"En sjat, geeste mit nao boave?"
"Huur kink", zèet dèe man "ich wil 't dich mer zigke,
ich höb inge wie 'ne baby!"
"Dat kan wal zieë", zèet 't medsje "mè dan neet mit mich.
Ich roop dich 't Monica wal, dat is pas in de lier."
"En sjat, zulle v'r dà mer nao boave goa?",
zèet 't Monica haoverwegs 't gleske champagne.
"Mich good", zèet d'r man dà wer "mè dat andert haat 't dich zieëker nog neet gezag:
ich höb inge wie 'ne baby!"
"Dà gank mer 'ns vraoge of de medam mesjien nog mit dich wilt goa,
mè ich in idder geval neet. Wie 'ne baby! Phhu!"
De medam dinkt "Iddere klant is ínge!" en geet mit d'r man 'n kamer óp.
Wente zich dà oetkleit, sjnapt de medam zich va sjrik bie de haore:
"Juzzes nèe, ich dach doe houds inge wie 'ne baby, mè zoeget, nèe!"
"Dat zigk ich toch al d'r ganse tied", zèet d'r man dà "wie 'ne baby: drie kilo en fieftig centimeter."
Kappe
't Frenske is vief jaor en heë wónt mit d'r pap en de mam óp íng kamer.
Dao mótte ze koake, eëte en lève. Ze sjlaope in éé bid.
Dat is tsemmelig krap, mè 't geet; ze zunt 't gewend.
Alling 't vrieje is get lestig.
D'r pap en de mam vinge, dat ze 't Frenske dao toch nog neet alles van an de naas hove te hange.
En dus mótte ze zich al 'ns get laote ivalle.
Es ze 's ovvends 'ns zin höbbe, wachte ze mitstal mer pis 't Frenske sjlupt
en ligke 'm dà gans vörzichtig óp 't sjlaopkamermetsje vör 't bid.
Wente dan toch wakker wedt, vertille ze 'm, dat sjlaope óp 'ne helle óndergrónd good is vör 't rugkske.
Mè sinds d'r pap de litste kier 'ns nuëdig 't bid oet moos
en mit de gedanke nog bie de mam óp zie ege Frenske troon...
En sinds dèe toen reep: "Jao, dat zal wal!
Dao liegke ze 'ne nuje te make en hie trène ze de ouwe kapót!"...
Sinds die kier dunt ze dat ooch mer neet mie.
En hüj haat d'r pap zich 'ne sjnipperdaag gepakt
en 's middigs kriege d'r pap en de mam dich ópins wustig zin um te vrieje.
Wat mótte ze zich dan noe alwer laote ivalle?
't Frenske zit al 'n haof oer a gen toffel te tekene, mè dat is neet genóg.
Daorum zèet d'r pap teëge 't Frenske: "Huur, jóng, ich weet get.
Sjtil dich an de vinster en kiek ofste óppen sjtraot inge zies mit 'n platte kap.
Dà krieste va mich vör gidder platte kap twieëfieftig."
't Frenske haat dao wal oere nao en geet direk a gen vinster sjtoa;
d'r pap en de mam sjuve sjtillekes 't bid in en beginne 'ns lekker te vrieje.
Nao vief menute zèet d'r jóng: "Pap, ich krieg twieëfieftig, dao kumt d'r pósbode"
"Good jóng," zèet d'r pap "blief mer kieke!"
Effe later: "Pap, alwer inge mit 'n platte kap. 'ne Blauwe óp d'r fiets"
"Good jóng, kiek mer wier; doe höbs al vief euro."
En dà is 't wer sjtil ónder de glaasgerdieng, mè neet vör lang, want ópins rupt 't Frenske:
"Pap, doe houds nog billiger nao de hore kinne goa,
dao kumt de ganse harmenie de sjtraot aaf!"
Leuk
Sjtunt twieë vrouwlüj i gen sjtraot te moelle.
"Och, noe kiek toch 'ns wat dat jungske 'ne waterkóp haat!"
"Dèe klinge dao? Dat is 't Sjirke va mie zuster."
"Jao, ich mieng ooch mèr, 't sjteet 'm waal leuk!