Lotto
Op 'ne goo daag kumt 'ne man heem van zie werk
en ziet in de keuëke 'n groeëte, sjplinternüj ieskas sjtoa.
"Woe kumt die ópins vandan?" vrugte an zieng vrouw,
"Is die überhaupt wal betaald, en woevan dà wal?"
"Ich höb in d'r lotto gewónne! Ich hou dich extra 'ns niks gezag.
Vingste ze sjun?" is 't antwoad.
Twieë weëke daonao kaome ze e nüj wesjmesjieng bringe.
Tieën daag later 'ne tillevies mit al d'r óp en d'r aa.
"Allenuj van d'r lotto," zèet de vrouw gans gruëtsj
" doe zuls zieë: ich höb dis reis gewoon väöl geluk."
Nao d'r bóntjas en de zónnebank wedt 't 'm toch get verdach.
Heë zèet nog niks. Mè óp 'ne middig dat heë jüs verlof haat, zèet zieng vrouw,
went ze d'r tillefoon haat neergelag,
dat ze nog 'n uurke de sjtad igeet vör e paar boodsjappe.
"Lutste mich teëge dèe tied al vas de badkoep vóllope?" rupt ze nog, vör ze de däör toe trikt.
'n Oer later mit de tesj nog onder d'r kapsjtok linea recta nao de badkamer.
Gans verwonderd rupt ze dà va boave an de trap:
"Woe is dat noe wer good vör? 't Steet mer vief centimeter water in de koep?!"
"Och, dat is woer ooch", rupt d'r man trük
"ich waor bang, dat dich 't lottoformeleer nat zów wedde."
Lèze
'ne Gek in 't gekkehoes haat gans ónverwach 'ne breef gekrege. Jaomergenóg kint heë zelf nog ging litter lèze. Vör de broeders wilt heë dat neet wete. Daorum geet heë durch 't gans hoes óp zeuk nao ieëmes dèe 'm dèe breef kint vörlèze. Dat vilt nog gaar neet mit. D'r inge nao d'r andere huit mit d'r kóp: "Nee jóng, ich kin ooch neet lèze."
Wente dà eindelek inge gevónde haat, gunt ze nao zieng kamer trük en deet heë de envelop oape.
Mit dat d'r breeflèzer evvel wilt beginne hult d'r andere 'm de oere toe.
"Wat is dat dan noe", zèet dèe "woerum hulste mich de oere toe?"
"Dèe breef is toch zieëker vör mich." is dan 't antwoad "Dao höbs doé toch niks mit te make, wat ze mích sjrieve."
Friette
Zèet ing vrouw teëge häör naobervrouw: "Zigk Leonie, maog ich hüj mieng friette in die vit bakke, dà maogste mörge ooch die vleesj in mieng soep koake?!"