De oer

Mit ‘ne flinke Sjsjsjsjttt! lukt ’t mieng vrouw de Hollendsje tieners
–die teëge ’n oer of twieë mit väöl gelach de disko sjunt te herkauwe –
op ’t idee te bringe dan toch mer in de richting van hun ege  tent te lope.
Dan is ;t wer sjtil.

Alling went mieng dochter zich an de ander zie van d’r vouwwage umdrieënt,huur ich wer ’t krake van die plank, wat mich e paar kier de nach deet dinke, dat ich in e sjpooksjlot sjlaop in plaatsj van op ‘ne camping in de Provence.
“Mörge toch mer wer ‘ns nao kieke” dink ich en zak wer in sjlaop, geholpe durch d’r Vin de France.
Effe later - meh ich bin te meug um op d’r wikker te kieke – begint get wierop e kink te kriesje.
Zoe te hure, nog kling, meh wat ’n kèel!.
“Zieëker akelig gedreumd”dink ich. “Gelukkig hubbe veër dée tied gehad.”
En ich drieën mich vör de zoeväölste kier um die nach.

In ’t drieëne sjtoeët ich mieng vrouw aa, meh van dée kant blieft ’t bie ‘ne zuch; ze is neet wakker gewoade.
Gelukkig mer, da huurt ze och neet, dat dèe Fransman sjuin neëve os
intusje zieng motorzèeg hat gesjtart um an zieng dagelijkse portie brandhoot te beginne.
Mein god, wat kan dèe man ronke! Dat die vrouw dat oethult.
Zelf lukke mich nooit mieë es drie of veer beum, dan hub ich al ‘ne flinke mep in ’n ziej gehad.
Gelukkig bin ich meug, en ich höb mich durch d’r naober in sjlaop laote bromme,
es ich wied weg ee gans dun "bliep-bliep, bliep-bliep" huur.
Heem dreum ich hieël dik en bizar, mè ich weet noe zieëker, dat ich neet tusje de aliens zit.
D’r "bliep-bliep, bliep-bliep" geet gewoon durch….kumt örges oet de väörtent.

Mieng vrouw is noe ooch wakker durch dat gebliep van die Marsmannetjes en makt mich - nog haof in sjlaop -
dudelek, dat v’r de oer van d’r oudste zoon hure.
Dèe is mitgereisd mit mienge zjwaoger en sjlupt noe mit zienge nèef in ee tentje neëve hunne caravan.
Dus dem kin ich neet vraoge um d’r get aan te doa.
Opins begriep ich, wat d’r jungste gisterovvend miengde mit "Nu weet ik hoe het moet!"
Heë zoot doe mit die oer te sjpeële; waor toevallig ins te vreug klaor vö mit te goa oet eëte.
Dèe sjnaak hat doe ’t alarm op die oer ingesjtild.

 

Gans oet gewende pak ich mieng pietsjlamp, um in de väörtent
in de hangtesj vör de sjoon te goa zeuke nao dèe gauner.
Die lamp is gaar neet nuëdig, want Bliepje wit neet va ophotte,
en mieng oere zunt nog ummer good.
Ich lik de lamp neer, ratsj de oer oet de sjoonstesj en begin op good geluk op allerhand knüpkes te duje.
Mè ich lèef an de ander zie van de generatiekloof en hub gee flauw idee wie ste zoe dink aaf mos zitte.
Gans toevallig is ’t mich dan toch gelukt, want Bliepje zjwiegt eindelek.
Mit ee  “Zo, en noe sjlaope.” kroep ich achter mieng vrouw.
Mè…op de boerderie neëve d’r camping zunt de Marsmannetjes noe bie d’r waakhond op bezeuk.
Zoe te hure, mot ‘t ‘ne flinke Bouvier zieë.
An ee sjtuk sjickte zie gebulcher de nach in, al klinkt ’t neet opgereegd.
Mesjien alling mer bedoeld vör zienge kollega ing boerderie wierop.

Es ich eindelek wer sjlaop – ’t mot ondertusje ’n oer of drie zieë – is Bliepje toch alwèr dao.
ich sjnap niks mie d’rva, vleeg wus de väörtent in en kniep ‘m woe ich mer kin.
Dat hulpt.
Vör alle zieëkerheed duj ich d’r kloemel mer in mienge sjlaopzak…de wits mer noeëts.
Went ich dan ’t driejde bliepje d’r nak umgedrieënd hub, wedt ’t mich bie ’t veerde toch te gek.
Noe wil ich dat dink neet mie hure!
En goo raod is duur, zieëker mit nachtarief.
Onder mie kusse zal ’n goo plaatsj zieë.
Mè op een of ander maneer haat Bliepje mieng vrouw wete te vinge,
want effe later makt die mich wakker mit “Ich huur dat dink nog ummer.”
Mit mienge duffe kop – vergeët net, dat v’r oet eëte waore – huur ich ‘m ooch.
Dan is ’t genog gewes.
Mit ing hand sjnap ich de oer, mit de ander de autosleuëtele,
rits de väörtent op en mit drie passe sjtaon ich bie d’r auto.
Nao ee paar klikke liekt ’t mormel op mienge sjtool en moagt vör mie part nog de ganse nach bliepen.
Mich zal ’t neet mie sjture.
Es ich um ach oer wakker wed gemakt – v’r gunt ‘ne daag nao de zieë, en dan moste bietieds vertrikke –
bin ich vroeë, dat  ich ‘ne doodgewone wikker huur ratele.