Voetbal
D'r Jo is 'ne richtige goo voetballer, mè heë zit ooch 'ns gèer an de teek.
Dizzenovvend haate getraind en wente d'r al gans get op haat, vrugte an d'r kastelein:
"Zigk, Bèr, du has toch ooch väöl versjtand van voetbal?"
"Probeer 't mer 'ns."
"Wedt hieboave bie d'r Petrus eigelek ooch gevoetbald?"
"Doe kins mich toch get vraoge, mè ich höb dao goo kontakte, ich zeuk dat vör dich oet."
De weëk daonao zit d'r Jo wer an de teek en nao e paar pilskes vilt 't 'm opins wer in:
"Doe zows toch get vör mich oetzeuke?"
"Jao," zèet d'r kastelein "höb ich ooch gedoa. Ich mot dich twieë zake durchgeëve:
- Daoboave bie d'r Petrus wedt wal degelek idder weëk gevoetbald.
- Doe sjtees vör zondig opgesjtild."
Wiewater
Drie nonne oet 'tzelfde kloster kaome tegeliek bie d'r Petrus an de poat en wille al direk durchlope.
"Ho,ho, zusters,"zèet d'r Petrus "dat geet zoemer neet!
Zuster Imelda, witd'r ech neet mie, datd'r wal 'ns tussje de gerdienge höbt gekeëke,
wie d'r tuinman 'n kier sjtong te douche?"
Zuster Imelda kriet 'n kleur wie 'n riepe tomaat.
"Mè ich zal uch neet te zjwoer sjtraove, dao achter sjteet 'ne bak mit wiewater.
Gaot uch dao de oge mer 'ns good wessje, en da kintd'r durchlope d'r hieëmel in."
Zèet zuster Begonia teëge zuster Andrea:
"Laot mich estebleef ieësj effe d'r mond sjpeule, da kins doe dich daonao 't krüts wessje."
Jezus
'ne Inbreëker is op zie gemaak bezig e hoes leeg te hoale.
Opins huurte 'n sjtim zigke:"Jezus hult alles in de gate!"
Heë sjrikt zich 't apezoer, deet de pietsjlamp oet en blieft stil sjtoa wachte.
Nao e tiedje klopt zie hart wer normaal, heë pietsjt de lamp wer aa
en sjiengt 'ns durch de kamer. Niks te zieë.
Dan geete wier mit inlane, mé opins wer: " Jezus hult alles in de gate!"
Heë sjiengt nog 'ns good durch de ganse kamer en dan ziete in d'r hook 'n papegaai zitte.
"Waors dich dat jüs uvver Jezus?"
"Zieëker," zèet de papegaai "ich wool dich mer waarsjuwe."
"Wents'doe zoe good kins kalle,
kinste mich zieëker ooch wal vertille wat dienge ege naam is?"
"Ich heesj Mozes." is 't antwoad.
D'r inbreëker mot effe lache:
" Wèe numt zieng papegaai noe in godsnaam Mozes?"
"Och," zèet de papegaai "dezelfde lüj die hunne Rotweiler Jezus neume."