Rob Lahaye,
illustrator van zoe’n twintig wietse op dis site.

Geboare i Heële op 24 oktober 1971. 

Al van jongs af aa is Rob bezig mit  kleur- en sjtripbeuk, en bie de kleuters maog’e al (zelf-verzonne) verhaaltjes vertille.
Op de Middelbare gong dat zoe durch mit sjtripfigure in ’t  wiskundesjrif. Nao ’n sjtage in Ambleside, Ingeland (1994), begos d’r Rob te dreume van ee ege sjtripbook.
Nao de sjtudie aan de Pabo waor ’t iddere ovvend bis in de kling uurkes tekene, tekene en nog ‘ns tekene. 

Zie ieësjte book, "Dokter Deuzings en Het Vervlookde Beer' (1997), kosde ‘m  e jaor, mè ‘t kreeg aandach in de media in Limburg.  In datzelfde jaor vroog Hub Beckers hem um ’n sjtuk of tieën illustraties te make vör zie wietsebeukske
"Isjjj dat noe zjjjoe leuk???" en later nog ‘ns vör  “Boeketje radiole” (2008).

In ’t onderwies loge de bane in dèe tied ooch neet vör ’t oprape. Nao hie en dao get vervange, gong heë moersjilderinge make, o.a. vör Roda JC op ‘t Parkstad Limburg Stadion.  

‘ne Vrund  vriend vertilde hem uvver ‘n privésjoeël in Thailand.
Nao ‘ne breef i Mei kroog heë ’n weëk later berich wienië heë kos beginne. 
De keus waor gemekkelig.  Alling, mam achterlaote i Heële veel ‘m zjwoer.
Op 28 augustus 2009 ging ‘t  nao Bangkok mit get kleier en ‘ne laptop in d’r koffer.  

Dao wirkt Rob noe nog ummer en zow neet wete, wat’e  andesj zow motte.
Begin 2010 lierde heë  zieng vrouw kinne op het werk en sinds 2011 zunt ze gelukkig getrouwd.

Nao jaore cartoons tekene in Bangkok bedach Rob ‘t hoofdpersonage “Waldorf Gumsikle”.
Dao haat’e inmiddels vief verhale van zoe’n 300 pagina’s uvver gesjreëve, mit illustraties en umsjlaag.  Noe nog ‘ne oetgeëver vinge, en andesj begint’e mit “self-publishing”.
Woe heë  in zieng jong jaore mit is begonne, dao zal’e och mit eindige, hopelek achter ‘n tekentoffel of bureau. Want wat is noe sjunder es dieng egen weld make en andere mit laote genete?

Heë wunsjt d’r Hub  väöl sukses mit de online-wietse.