In 'n coupé van d'r trein zitte twieë manslüj an de vinster en neëve d'r inge nog ing vrouw.
Ze kinne zich neet, mè wie geweunlig kalle ze e paar wöad mit ee uvver 't wèer en 't voetballe.
Dà is 't wer e tiedsje sjtil.
En jüs went 't effe sjtil is, mót d'r man dèe alling zit, 'ne wustige laote vlege.
Mè ja, in d'r trein tussje vrèem lüj is dat al zoe get.
Wente 'n haof menuut mit de batse haat zitte kniepe, vilt 'm ópins, wie e wónder, 'n ouw trük in.
Heë makt zich d'r doem nat en düjt dem in 'ne groeëte baog uvver de roet hee.
De roet zit gelukkig get lós in de sjpónning en 't guft e geroebbel wie e dónderwèer.
De lüj teëgenuvver en neëve 'm kieke 'm aa of ze 't i Kölle höbbe hure dóndere.
Dat zal d'r man 'n zörg zieë, want intussje isse waal zienge vóts kwiet en ginge haat get gehuurd.
E paar menute later deete dat nog 'ns en dan is 't gelukkig aafgelope mit de valsje loef.
Dà ziete ópins, dat dèe andere man ooch zienge doem nat makt en langs de roet roebbelt; drie, veer kier achteree.
Verwónderd vrugte: "Zigk hier, kint deër die trük mit d'r doem ooch?"
"Dat zal ich uch zigke," zèet dèe dan " 't geluid krieg ich al good, mè noe d'r sjtank nog!"
Verkes
'n Ruimtekapsül is in 'n baan um de eëd gebrach mit d'r Sjeng en twieë verkes d'rin.
Went ze good en waal in de richtige baan zitte klinkt 'n stim van Houston Control:
"Here Houston Control, pig number one, repeat your task!"
En 't ieësjte verke zèet:
" Ich mót alle boordcomputers in de gate hotte en óch de temperatuur in de kapsül."
En effe later: "Here Houston Control, pig number two, repeat your task!"
't Twidde verke zèet:
"Ich mót onderzeuk doa mit bacterieë, mit fruitvleegskes en Vlijtige Liesjes."
En es litste:
"Here Houston Control, Limburger Sjeng, repeat your task!"
En d'r Sjeng antwoadt:
"Ich mót twieë kier d'r daag de verkes vore en vör de res uvveral vanaaf blieve."
Trouwe
Frenske:"Zigk, pap, trouwe kamieële ooch?
Pap:"Jao, jóng, alling kamieële trouwe!"