D'r roeë Huub
D'r roeë Huub Klinkeberg waor in mieng jeug inge van de vief sjlechtere i Gulpe.
Die ander veer hoosje Frank, America, Kroes en Lemmerlijn.
D'r roeë Huub houw ummer gèer 'ne rashond. Zoe och 'n kier 'ne Deense Dog.
Dèe woad flink verwend.
Logies bie 'ne sjlechter zulste dinke, mè dizze dog kroog och sjlaagroomhoorntjes.
En links op 20 meter wonde d'r bekker Ortmans en rechts op 100 m d'r bekker Pijls.
Mè went 't sjlaagroomhoorntje van d'r Ortmans waor,
lusde d'r hond 't neet,
en dat van d'r Pijls waal.
Ukkel en De Bilt
Op de bus van ach oer nao Heële waor 't ummer grellig druk.
Dat waore vöral tieners vör 'n middelbare sjoeël, wie Bernardinus of Grotius.
Iddere mörge sjtapde och de hiere, Bleijlevens en Nicolaye in.
Soms koste ze nog jüs zitte, soms och neet.
Of 't kinnisse vanee woare, of mesjien kollega's, weet ich neet,
mè iddere mörge kalde die twieë oetgebreid uvver 't wèer.
En zoe kome ze oeteindelek an d'r bienaam "Ukkel en De Bilt"
D'r Sjèèrkwas
D'r Sjèèrkwas waor d'r bienaam van d'r Frens Buchholz.
Dèe hou Hotel, Café, Restaurant De Kroon,
én neet te vergeëte d'r cinema.
Van d'r Frens is de oetsjpraok:
"Wat Philips is vör Eindhoven, bin ich vör Gulpe".
D'r Boeda
D'r Schmetz hou ooit doeve gezat op 'n vluch oet Boeda ( de "helft va Boedapest).
Dat lieëverde hem d'r ieësjte pries op,
en vanaaf toen woad'e i Gulpe d'r Boeda geneumd.
D'r Klinge Meter
D'r Klinge Meter waor d'r bienaam van 't Sjefke Kaelen,
eigenèer van 'n good lopende zaak in iezerware en landbouwmachines.
Heë waor mesjien 1.50 m hoeëg, mè hou mit zieng vrouw, van 1.80 m, neuëge kinger.
Op zieëkere daag gonge mieng mam en mie zuster
mit d'r klinge van e jaor of veer te voot nao Mergraote.
Dao wonde mie zuster.
Wie ze e sjtuk Gulpe oet waore, zoge ze va wieds d'r Klinge Meter de helling aafkoame.
Dèe gong nao heem.
Wie 't Sjefke hun zou passere, hole die twieë d'r aom op.
Zou dèe klinge get zigke uvver zoe'ne klinge man???
Mè wie 't Sjefke mit 'ne "Gooiendaag" eemaol langs waor, zag d'r klinge:
"En 'r heet och nog
'ne hoed op!"
De Mechel
De Mechel waor 'ne vriegezel, örges in de jaore twintig of dartig.
Op zieëkere daag houwe e paar zoepvrung d'r plaan gemak
um 'n kier nao Paries te goa en ze begoste flink te sjpare.
Wie 't get kotter op de reis aagong,
koom inge van die veer op 't idee de Mechel op hun köste mit te laote goa.
En zoe gebäörde.
De Mechel gong mit nao Paries, en ammezeerde zich good.
Wie ze oeteindelek wer i Gulpe oet de bus sjtapde, zag de Mechel:
"Sjpaart mer good, jonge, da gunt v'r komend jaor wér."