Vut

 

D'r Karl is al innige tied in de Vut en dat bevilt 'm good.
Mé zieng vrouw, 't Fina, vingt 't mer niks, want heë deet werkelek niks igen hoes, ál blieft liegke.
Zèet 't Fina 'n kier: "Jong, de kraan op de badkamer blieft mer druppele,
wilste dao 'ns e nüj lèerke in doa?" dan wieste zich vör d'r kop en vrugt:
"Höb ich hie soms loodgieter sjtoa?"
Of went 't Fina zèet, dat de däör van de sjlaopkamer al zoe lang krakt,
wieste zich vör d'r kop en vrugt:" Höb ich hie soms timmerman sjtoa?"
Mé op 'ne daag kumte heem van 'n lang wandeling mit zieng vrung
en toevallig vilt 'm op, dat de kraan op de badkamer neet mie druppelt.
Nüjsjierig geete nao de sjlaopkamer en düjt 'ns an de däör. Juzzes nee, die krakt neet mie! 
"Tja, jong" zèet 't Fina "ich waor 't zat, en ich höb d'r zoon van de naobere gevraogd.
Dèe is erg handig en waor dao zoe mit veëdig."
"En wat vroog zich dèe dao vör? Doe höbs dich toch neet laote aafzitte?"
"Mé nee, heë zach, dat ich 'm 'ne lekkere toert kos bakke,
óf heë wool wal 'ns 'ne noemer mit mich make."
"Wat? Da höbst'm toch zieëker dèe toert gebakke?!"
Da wiest 't Fina zich vör d'r kop en vrugt:
"Höb ich hie soms bekker sjtoa?"

 

Beer

 

'ne Sjtotterèer haat erg väöl meute mit de b.
Wente zich in 'ne kaffee e beer wilt besjtille,
wedt 't mitstal:"Maog ich e bbbbbbb 'ne cola?"
Heë kalt dao toevallig 'ns uvver mit zienge vrund, en dèe wit gelukkig wal 'n oplossing:
"Gewoon pils zigke, da hofste ooch neet te stottere, dat zulste zieë."
De kier d'rop zèet d'r sjtotterèer: "Kastelein, maog ich e pils?"
"Mé zieëker, meneer, wiltd'r Brand of Bavaria?"

 

Maot

 

D'r Sjeng is in 'n sjoonszaak en d'r verkeuper haat vör 'm gemeëte, dat'e maot 43 haat.
Nao get zeuke geet d'r Sjeng nao heem mit zjwatte sjoon, maot 42.
D'r verkeuper sjnapt dao gaar niks va, mé…. d'r klant is kunning.
Twieë daag later kumt d'r Sjeng wér in de zaak en gult zich broeng sjoon, ooch maot 42.
Went d'r verkeuper 'm da vrugt, wie dat zit mit die 43 en 42, zèet d'r Sjeng:
"Dat zal ich uch zigke: 'ne mond gelèe is mich de vrouw sjtreupe gegange,
mieng dochter va vieftieën kriet 'ne baby en d'r jong is an de drugs.
Wat miengtd'r, went ich van t werk heem kom, wat e heerlek geveul dat is,
went ich die verrekde maot 42 oet kin sjtampe?"