Koffie

Get jaore gelèe kumt 'ne man 'ne kaffee in, zit zich an de teek en besjtilt zich 'n tas koffie.
"Dat is dan € 1.30" zèet d'r kastelein.
D'r man sjarrelt get in de beuësj en wurpt dartieën dubbeltjes achter de teek óp gen eëd.
D'r kastelein zèet niks en rapt de dubbeltjes óp.
D'r volgende daag betalt dèe man nao lang sjarrele toch mer mit twieëfieftig.
"Noe höb ich dich!" dinkt d'r kastelein, zit 'm de tas koffie vör de naas en wurpt twelf dubbeltjes óp gen eëd.
Mè d'r man verreurt zich neet en drinkt rustig zienge koffie óp.
Went de tas lèeg is, wurpte nog éé dubbeltje d'rbie en zèet:
"Gef mich nóg ing tas koffie, estebleef."

 

Hostie

Oetgereëkend óp d'r zotterdigovvend laat merkt d'r pesjtoer dat de wc versjtópt is.
Mè gelukkig is heë ieëmes mit twieë rechse heng en ooch neet bang vör vies werk.
"Mörgevreug is dat zoe gebäörd" zèete teëge zichzelf en geet nao ge bid.
D'r volgende mörge in alle Herrgottsvrugde sjteete al mit d'r overall aa in de buus te reure,
mè 't wilt nog neet zoe lukke.
D'r tied vlügt en ópins kumt 't Anna 'm rope, dat 't tied is vör de Mis.
Gelukkig is d'r aafveur jüs oape gegange.
Heë deet zich zuver aa en wisjt zich de heng veer kier mit zeep, mè ze ruke nog ummer.
"Meneer pesjtoer! 't Is de huëgste tied!"
Da geete mer nao gen kirk.
"Wie mót dat geliek mit die hosties?"
zèete an d'r köster, "dat ruke de lüj toch zieëker?!"
"Witd'r wat," zèet d'r köster "v'r dunt of dat get nüjts is.
Ich gaon mit uch mit en gef uch idder kier 'ne hostie óp de hand.
En deër sjeet 'm vanaaf de vlakke hand bie de lüj in d'r mónd. Da rükt ginge get."

De lüj kieke waal get vrèem: "'t Lichaam van Christus" en flietsj d'r hostie d'r mónd in.
Opins ziet d'r pesjtoer d'r Fransen in de riej sjtoa en dèe man haat, ocherm, 'ne flinke hazelip.
"Foute boel" dinkt d'r pesjtoer, "bie d'r Fransen kin ich toch ech neet sjete.
Dan mer ing kier óp de gewoon meneer. Mesjien rükte niks."
"'t Lichaam van Christus......"
Mè koom haate d'r nuje hostie van d'r köster óp de hand,
offe huurt d'r Fransen mómpele: "Issjjj 't dissjjj kier zjjjieëker e sjjjtuk van de vót."

 

Lache

Went d'r Karl in d'r gaat an't wirke is,
ziete d'r Joep nao boete koame mit e gezich wie e dónderwèer.
"Mè Joep, wie kieks doe? Wat is mer loos, jóng?"
"Och sjei oet!  't Fieng geet mörge vör drie weëke óp vakans mit zie zuster."
"En da kieks doe wie 'ne sjtinkkieës? Ich zow lache en zinge!"
"Dat miengs doe! Ich hóf mer íng kier te lache en 't geet neet!"