Sjpringe
D'r Peter wirkt al jaore in d'r bouw, same mit d'r Frans en d'r Sjeng.
De litste monde wirke ze an 'n groeëte flat en
ze höbbe zich jüs óp 'ne sjtieger óp de twintigste etaasj gezat um de botteramme te eëte.
"Mè noe nóndedju, höb ich toch alwér kieës d'róp!" zèet d'r Peter, wente 't trömmelke oape deet,
"iddere daag kieës, dao krieg ich d'r sjiet va.
Went 't Leonie mich mörge wér kieës d'r óp deet, sjpring ich hie van die plank aaf, dat belaof ich uch!"
"Wieste noe d'r uvver begins," zèet d'r Frans "ich höb 't Anna ooch al hónderd kier gevraogd,
mich neet iddere daag sjink d'r tussje te doa, en kiek 'ns hie: alle veer mit sjink.
Mè noe is 't genog gewes, mörge sjink en ich sjpring!"
"Wat miengtd'r dà va mienge hagelsjlaag?" kumt d'r Sjeng d'r achteraa.
Mè ich doon mit uch mit: mörge hagelsjlaag en ich sjpring ooch!"
D'r daag d'róp zitte ze wér óp de twintigste, mè ginge haat zie trömmelke al oape gemak.
Ze wete alledrie wat ze gezag höbbe. Dan huft d'r Peter es ieësjte d'r diksel óp en sjpringt van d'r sjtieger aaf.
Pis ónder hure ze 'm nog "Kieëeeeeeeees" rope.
D'r Frans kiekt 'ns ónder d'r diksel: sjink! En mít sjpringte van de plank aaf.
En of d'r duvel 't deet, d'r Sjeng haat hagelsjlaag d'r tussje; en ooch dèe sjpringt nao ónder.
Nao de begreffenis zitte de drie widvrouwe bieëe mit 'n tas kóffie.
Ze kalle natuurlek uvver hun manskeëls.
Dat van die botteramme höbbe ze intussje gehuurd van inge van 't werk.
"Went ich gewete hou, datte de naas zoe vól hou van dèe kieës,
hui ich 'm toch zieëker 'ns get sjink of lèverwoasj gegeëve." zèet 't Leonie.
"En mienge Frans is jüs gesjprónge vör de sjink!" sjnottert 't Anna.
"Dat is nog niks," geet 't Mia wier "mienge Sjeng makde zich de botteramme ummer zelf."
Gümke
't Is erg druk in d'r tram. Alle sjteul zunt vól.
Ooch d'r Harie en zieng zieëve kinger höbbe nog jüs 'n plaatsj gevónde.
Twieë haltes wier sjtapt 'ne ouwe man in mit 'ne wandelsjtek.
Dèe mót sjtoa blieve, want ginge sjteet vör 'm óp, ooch die van d'r Harie neet.
D'r tram trikt forsj óp en vuurt hél.
D'r man mit d'r sjtek haat meute um neet te valle;
zienge sjtek roetsjt ummer wer uvver d'r vloer van d'r tram.
Went d'r Harie dat ziet, zèete:
"Zig, hier, wentd'r uch noe 'ns e gümke ónder dèe sjtek makt,
da roetsjte neet zoe gauw voet."
D'r man kiekt 'm 'ns vies aa en zèet da:
"Es dích get dikker e gümke gebroekt houds, huij ich noe plaatsj vör te zitte!"
Raone
E medsje in d'r Club Annabel haat zich 'ns get nüjts laote ivalle.
An d'r binnekant van de boavebee haat 't zich twieë voetballere laote tatoere:
links d'r Papin en rechs d'r Klinsmann.
'ne Klant dèe alletwieë de name wit, maogt 'n kier vör niks.
Ieësj kumt 'ne Pruus:
"Also, Fraulein, der eine ist der Klinsmann aber der andere kenn ich leider nicht."
Da kumt 'ne Fransman:"A gauche c'est Papin, mais a droit....?"
D'r driejde dèe 'ns maog raone is 'ne Hollender:
"Tja, meisje, de linkse en de rechtse ken ik allebei niet,
maar die in 't midden, met dat zwarte kroeshaar en die dikke lippen, dat moet Reiziger zijn."