Gouwe WC
"En jóng, alles good?" zèet d'r Pol teëge d'r Sjaak, went dèe zich neëve 'm a gen teek zit.
"Sjei oet, ich bin nog neet gans dao.
V'r móste gisterovvend bie ieëmes zinge mit d'r koer.
Ich kant dèe man gaar neet, mè dèe hou e jubileum.
Dao höb v'r 'm ing verpaafd, ouw hoor, keël, dèe hou zich neet laote kinne.
Mè ja, dèe hou ooch de beuësj d'r vör.
En e hoes, zigk ich dich! Uvveral eke en marmer en gouwe krane!
Dèe hou zoegaar 'n gouwe wc! Ich wós neet wat ich zoog."
"Och doe mit dieng gouwe wc. Doe waors zieëker vól."
"Wie ich óp heem aa góng, waor ich ooch vól,
dao geet 't zich gaar neet um.
Mè die wc waor ech va good. Zoewaar wie ich hie noe zit."
"Ier ich dat gezieë höb, geleuf ich dich dat evvel neet."
"Dà witste wat v'r dunt, v'r gunt noe d'r hee.
V'r höbbe dao sjun gezónge, die lüj wille dich die gouwe wc wal effe laote zieë,
en binne vief menute zunt v'r wer voet. Kóm!"
Went de däör ópgeet zèet d'r Sjaak gans vruntelek:
" Dag mevrouw, d'r kint mich mesjien neet mieë,
mè v'r höbbe hie gisterovvend vör d'r man gezónge mit d'r koer.
En noe wilt mienge vrund, Pol, neet geleuve dat deër 'n gouwe wc höbt.
Maog ich 'm die mesjien 'ns effe laote kieke?"
Mè koom isse oetgesjproake, of de vrouw drieënt zich um en rupt nao binne:
" Piet, kóm 'ns flot an de däör, hie is dèe keël dèe dich gisterovvend in de bombardon gesjeëte haat!"
Vrund
D'r pesjtoer wandelt uvver d'r kirkhóf en ópins huurte in ing ander riej ieëmes grellig kriesje:
"Mienge allerleefste vrund, waorste toch mer noeëts doeëd gegange, ich ving dat toch zoe erg!".
Heë löpt rustig d'r hee en ziet 'ne man zitte kriesje bie e graaf
woe alling mer d'r naam van 'ne man óp sjteet.
"Och hier", zet d'r pesjtoer, "höbt d'r nog ummer zoe verdreet?
Dèe man is toch al hos twieë jaor doeëd. Waor 't zoe'ne goo vrund van uch?"
"Dat ooch, meneer pesjtoer, mè wat erger is, ich bin e paar mond later mit zieng widvrouw getrouwd."
Sjpegel
'ne Vrachwage-chauffeur belt zienge baas óp:
"Zigk baas, mienge boetesjpegel is kapót, wat mót ich noe doa?"
"Jao, mèh, bistoe dan noe gans beklópt?
Móste mich daovör ópbelle?
Da zitste toch zieëker bie de ieësjte de bitste garaasj gewoon 'ne nuje d'róp!"
"Jah, baas, mótd'r hure, dat is toch lestiger es deër dinkt, want d'r wage liegkt d'róp!"