Pille
't Wilt d'r litste tied neet mie zoe good floepe mit d'r Jean.
Dat wilt zigke, i ge bid. Dao haate al ummer mieë meute um d'r klinge jóng rech te kriege.
Mè wente nao lang zevere van 't Els mit dat probleem bie d'r dókter kumt, haat dèe al direk e gerussjtillend woad vör 'm: "Huur, Jean, dao höbbe väöl mieë manslüj las van es doe dinks, en toevallig höb ich gister get gans nüjds binnegekreëge. Dat is get gans aparts: erektiepilkes die wirke óp e flutsje. Die numste e tiedsje van te vöre al in en went 't nuëdig is, hófste mer effe te fleute en dà sjteete, wie 'ne seldaot in de houding, zoe lang wieste wils. Deeste
"Sjjjjjjt!" , is direk wer al normaal."
"Dà gef mich dao mer 'ns 'ne groeëte pót va mit, dókter!"
"Nee Jean, dat geet neet, dao zunt die pille väöl te duur vör;
e sjtuk of drie kin ich d'r dich mitgeëve."
Mit zieng drie pille in e duëske geet d'r Jean wer te voot óp heem aa. E haat goo zin en zin. Um gèe risiko te lope ooch mer íng pil te verleze, sjlikte ze alvas alle drie inins. Dat kós, hou d'r dókter gezach.
E mót alling nog bie d'r Wiel agoa; dem wilte nog 't een en ander vraoge uvver de kanaries. Mè d'r Wiel wónt wied boete 't dörp en mit die nüj pille wilte toch neet al te laat heem-koame. Daorum pakte d'r kótste weëg langs 't spoar en dao probeerte ooch mer direk de iesjte pil.
"Fiewiet!" ..... en jummig dao sjteet d'r seldaot al.
"Sjjjjjjt!"..... en d'r Jean löpt mónter wier óp d'r Wiel a.
Ópins huurte achter zich 'ne sjtoomtrein akoame. Dat zulle de jónge van d'r nuje klub wal zieë. Die zunt ram gek van al wat óp sjtoom geet. Zienge naober, d'r Sjaak, kint ooch al mit zoe'n dink vare.
"Fieëwiet" klinkt 't vlak achter d'r Jean. Dat is verdomme d'r Sjaak mit zieng sjtoomfleut. Dèe kint jao überhaupt neet wete wat noe bie d'r Jean in de brook gebäört. En in 't langsvare lut d'r Sjaak nog 'n ekstra portie sjtoom uvver de rails blaoze: "Sjjjjjjt".....en de twidde pil is ooch voet.
Ze kalle lang uvver de kanaries en boete gekoame ziet d'r Jean, dat 't al tsemmelig duuster is. Heë zit flink d'r pas d'rin, en ziet heem durch de groeëte vinster, dat 't Els neet mie ónder is. "Zieëker al óp de sjlaopkamer?" dinkte en touwt zich vör binne te koame. En mit de brook al i gen heng brulte de trap óp: "Els!!! Fieëwiet.... kóm 'ns kieke, ich höb nüj pille van d'r dókter!!!"
"Sjjjjjjt!" rupt 't Els van oet de sjlaopkamer, "doe maks de kinger wakker!"
