Oalefant
D'r Harie kint hieël sjlech wietse ónthotte en dat vingte gaar neet leuk. Mè hüj haate geluk. Zienge broor wiejt 't nüj hoes in en d'r naober begint bie 't ieësjte pilske al mit ing wiets:
"'t Waor örges in Afrika al gans lang grellig druëg en 'ne oalefant waor al daag an't zeuke nao water. Ópins ziete 'ne sjunne groeëte pool. E sjtoegkelt d'r ópaaf, sjtikt zienge sjlurf deep in 't water en begint te zoeke. Mè.... in dèe pool zoot 'n forsje krokodil en die hou al weëke gee vleesj mie
gegeëte. Die trikt de moel óp, en biet dèe oalefant pis hie d'r sjlurf aaf." En d'r naober sjniejt zich mit 'n hand van de naas pis an de kin. "Doe zèet dèe oalefant (mit 'ne hoop valsje loef d'rbie): "Isjjj dat noe zjjjoeë leuk ???"
Die is gemekkelig te ónthotte dinkt d'r Harie, nog iere is oetgelache, die gaon ich 'n nüj kier ooch 'ns vertille!
Wente e paar weëke later bie zie zuster óp de koapere broelef is genuëdigd, witte ging inkel wiets mie van dèe ovvend alling die van d'r oalefant. En óp 't rendsje van d'r sjtool zitte te wachte óp de ieësjte wiets.
Gelukkig doert 't neet zoe lang en dan kint ooch d'r Harie 'ns zigke: "Kintd'r die van dèe oalefant dèe zoene doasj hou?.....En dan beginte vól goo mood te vertille van d'r oalefant...en d'r pool water...en......
Mè ocherm, 't is 'm neet gegund; koom haate gezach: "...pis hie d'r sjlurf aaf!" offe ziet an de uvverzie in d'r krink 'ne man zitte - mesjien inge van 't werk van zienge zjwaoger?- mit 'ne flinke hazelip.
"Mieljaar, dao biste wer 'ns a get begónne!" huurte zichzelf dinke en hult óp sjlaag d'r mónd. Effe is 't doeëdsjtil in de kamer..... idderinge wacht nog óp d'r aafloop.....
En dan ópins zèet dèe miensj mit dèe hazelip:
"Isjjj dat noe zjjjoeë leuk ?!!!"
